Exodus 32
01Dou t volk vernam, dat Mozes nog aaltied nait weer van baarg ofkwam, gingen zai om Aäron tou stoan: "Tou, moak ons n god dij veur ons oetgoan kin. Wie waiten ja hail nait wat ter mit dij Mozes, dij man dij ons tou Egypte oethoald het, gebeurd is."
02"Pak van joen vraauwlu, joen zeuns en joen dochters heur golden oorringen òf," zee Aäron tegen heur, "en lever dij bie mie in."
03Dou plokte t haile volk zok ringen tou oren oet en brochten dij bie Aäron.
04Aäron pakte t gold van heur aan, luit dat smelten en goot ter n beeld van in vörm van n kaalf. Dou raipen Isrelieten tegen nkander: "Kiek volk, dit is de god dij joe tou Egypte oethoald het."
05Dou Aäron dat zag, baauwde hai doar veur t golden kaalf n altoar en hai kundegde òf: "Mörgen hol wie n feestdag veur de HEER!"
06Aanderdoagsmörgens brochten ze al vroug brandovvers en vree-ovvers. t Volk ging der bie zitten om te eten en te drinken en loater haren ze n groot feest mit meziek en daanzen.
07Dou zee de HEER tegen Mozes: "'Goa omdeel, want t volk dastoe tou Egypte oetlaaid hest, het t dik bedurven.
08Ze binnen nou al van t pad ofweken dat ik heur wezen heb. Ze hebben zok n golden beeld van n kaalf moakt en doar hebben ze zok veur bogen, doar hebben ze aan ovverd. En ze raipen tegen nkander: 'Kiek volk, dit is de god dij joe tou Egypte oetlaaid het.'"
09Wieder zee de HEER tegen Mozes: "Ik heb nou eerst goud vernomen dat dit n volk van stiefkoppen is.
10 Doarom, loat mie geworden. Den kin ik mien kwoadhaid op heur richten, den kin ik heur om haals brengen en die tou n groot volk moaken."
11 Mor Mozes perbaaierde de HEER om te proaten en tegen te holden: "Och HEER, woarom zol ie joe zo kwoad moaken op dat volk, dat ie eerst mit grode kracht en n staarke aarm tou Egypte oetlaaid hebben?
12 Woarom zol ie Egyptenoars zeggen loaten: 'Hai het heur mit opzet oet Egypte vothoald om heur in de baargen om haals te brengen en van wereld vot te doun.' Wees toch nait zo vergrèld, dou joen volk toch gain kwoad.
13 Denk toch aan Abraham, Isaak en Jakob, dij joe zo vertraauwd wazzen en aan wèl ie joen belofte geven hebben: 'Ik zel joe zoveul noazoaten geven as ter steerns aan lucht stoan en t haile laand dat ik joe beloofd heb, zel veur aaltied van heur wezen.'"
14 Dou muitte de HEER t wat e zegd haar over wat e zien volk aandoun zol.
15 En Mozes draaide zok om en ging mit baaide stainen ploaten onder aarms bie baarg omdeel. Ploaten wazzen aan weerszieden mit wetsveurschriften beschreven.
16 God zulm haar dij ploaten moakt, God zulm haar ze mit zien aigen handschrift graveerd.
17 Dou Jozua t lewaai van t volk heurde, zee e tegen Mozes: "Dat kon ducht mie wel t geluud van oorlog in t legerkaamp wezen."
18 "Mor t is gain geluud van n overwinnen," antwoordde Mozes, "en ook gain geschraif bie n nederloag. Zo te heuren binnen ze aan t zingen."
19 Mor dou hai dichter bie t legerkaamp kwam en t kaalf zag, en t gedaans doar omtou, wer hai zo vergrèld, dat hai smeet stainen ploaten doar onder aan baarg in groezels.
20 Dou greep hai t kaalf dat ze moakt haren, verbraandde dat in t vuur en vermoalde t tot stof en streude dat over t wotter hèn. Dat luit hai Isrelieten opdrinken.
21 Hai zee tegen Aäron: "Wat het dat volk die toch doan, dastoe heur zoks swoare zunden doun loaten hest?"
22 "Doe most mor nait kwoad worden," antwoordde Aäron, "Doe kenst dit volk ja. Doe waist ja zulm wel, dat dit n min volk is.
23 Ze zeden tegen mie: 'Moak n god veur ons dij veur ons oetgaait. Wie waiten ja hail nait wat ter mit dij Mozes, dij man dij ons tou Egypte oethoald het, gebeurd is.'
24 Dou heb ik tegen heur zegd: 'Wèl gold het, mout dat mor ofdoun en aan mie geven.' Ik gooide dat in t vuur en dit kaalf is ter dou weer oetkommen."
25 Mozes zag dat t volk haildaal ket-oet was, tot vermoak van heur vijanden. Aäron haar heur ook ja de vrije haand geven.
26 Mozes ging bie d'ingang van t legerkaamp stoan en raip: "Wèl veur de HEER is, mout bie mie kommen." Ale Levieten gingen dou om hom tou stoan.
27 Hai zee tegen heur: "Dit zegt de HEER, de God van Isrelieten: 'Dou aalmoal joen sweerd op zied en goa deur haile legerkaamp hèn van aine ingang noar d'aander: moak elk dood, al is t ook joen bruier, joen vrund of ain dij joe noa staait.'"
28 Levieten deden wat Mozes heur zegd haar: dij aigenste dag werden drijdoezend man ombrocht.
29 Mozes zee dou tegen Levieten: "Vandoag heb ie joe overgeven aan de HEER deur t ovvern van joen bruier, joen vrund, van ain dij joe noa staait, vandoag heb ie zien zegen verdaind."
|
